تلفون الشول ست القول مسرحية قصيرة

يحيى فضل الله
تلفون الشول ست القول

مسرحية قصيرة

الإهداء

إلى أصدقائي المسرحيين، شركاء الحلم والفكرة
لعل هذا النص المسرحي القصير يشفع لي غيابي عنكم
وأقول في اليوم العالمي للمسرح: - إن أجمل العروض المسرحية هي تلك التي لم تعرض بعد.
 

المسرح خال تماما من الديكور والاكسسوار، ست شخصيات تعطي ظهرها للجمهور متنتاثرة على خلفية وجوانب المسرح، اصوات رنين تلفونات متضخم، تلتفت الشخصيات الست إلتفاتة حادة و في وقت واحد، صوت رنين التلفونات مرة أخرى.

الشخصية 1:- يتحدث في التلفون ده كلام شنو ده؟، ما بصدق، معقول؟، ياخي قول كلام تاني، دي مشكلة، مشكلة كبيرة، ما هو شوف...............

شخصية 2 :- الو، الو، ماسامع، ارفع صوتك، بقول ارفع صوتك يا بني ادم، ايوه، الشول ست القول بعرفا، مالا؟

الشخصية 3:- ده كلام كبير جدا، اقول ليك من حقها، ايوه ما لازم تعمل كده، والله يعني، النتيجة حتكون غريبة، يا زول دي دربكة عديل كده

شخصية 4 :- هي لكين ياجودليه، ما عندها حق، ده نان شيتا ساهل، ده شيتا يقطع الحشا، دا كا اليلة راجلي بله قال لي الشول حجيب دقلا يكركب

شخصية 5:- هي مصرة علي الموضوع ده، بلاهي؟، هي متحركة عليهم؟ غايتو، حيتعبو معاها، لا، اكيد با خوي، دي الشول ست القول

شخصية 6: - بلاهي العظيم؟، لا كويس، كويس جدا، الله كيف؟، انت قابل المسألة ساهلة، لا ،ابدا، انت الله ما ليك ولاشنو؟ ، دي الشول، الشول ست القول

تتداحل اصوات الشخصيات وهي تتحرك، كل بتلفونه نحو مقدمة المسرح في مواجهة الجمهور، مع ننداخل هذه الاحاديث تظر جملة، الشول ست القول بين لحظة واخرى ـ تقف الشخصبات وهي لا زالت تتحدث عبر التلفون وتختلط هذه الاحاديث وتتداخل وفي لحظة واحدة تظهر حركة وضع السماعات وتتراجع الشخصبات الى الوراء بحركة واحدة ايضا بينما تظهر الشول ست القول وهي تقف في وسط المسرح وتشير الشخصبات نحوها وبصوت واحد ككورس

الكورس :- اهي دي الشول ست القول

يختفي الكورس من المسرح

الشول:- يا لحاق بعيد، يا صاحب الفرج والضيق، تاخد لي حقي من الناس ديل، أريتم بي نار شقردي، شقردي في بحرو والنار تاكل ضهرو، عليكم الله شوفو مغصة الناس ديل، ولدي جار النبي؟ ، ولدي الفضل لي؟ ، الفرد وحيد، قبال ده ابوهو مات في الجنوب، أخوهو عبد العاطي ضربو لغم في جبال النوبة، جتتو ما اتلقت، أها جار النبي داك الليلة، مرق زي عوايدو كل صباح في شان يجري في درب الشغل، جار النبي كمل الثانوي وربنا ما اداهو الجامعة، قال يشتغل عشان يمتحن تاني، أها في مروقو ده يلمو فيهو ويقبضوهو ويرسلوهو للمعسكرات، معسكرات التدريب، في شان شِنو؟، في شان يجاهد قالوا في الجنوب، أها بقيت أفتش ليهو من معسكر لي معسكر ومن محل تدريب لي محل تدريب، ما خليت القطينة، حتي فشلا وصلتها، جبل تولوشي وصلتو، وحاتكم ما لقيت أتر، هم بخلوني أدخل أشوفو ما من الباب بقولو لي ما في، قلت ليهم يا ناس أنا وحيده و الود ده أبوهو مات قبال ده في الجنوب و اخوهو الكبير جتتو ما اتلقت، ضربو لغم في جبال النوبة، وحاتكم زي البكلم في طرش، يا ناس خلو لي جار النبي، هو الفضل لي، انا وحيده، انا البراي تقع علي مصائب حرب الجنوب دي و لاشنو؟، اها قالو في المثل سيد الرايحة فتش خشم البقرة و تراني بفتش ما خليت مكتب، ما خليت مسعول، كرعي حفن في درب المسعولين والمكاتب الكبار، اسوي شنوعاد؟ اها لي الليلة لاقيت البقرة و لاقيت خشما.

اثناء منلوج الشول ست القول اعلاه يكون الكورس قد جهز مكتب المسئول الأول وعليه جهازي تلفون وكرسيين، بعد انتهاء الشول من المنلوج يتقدم الكورس بخطوات حذرة إلى أمام المسرح ويغطي الشول وبحركة واحدة حذرة يشير الكورس نحو الجمهور بالصمت وذلك بوضع الأصابع على الشفاه، ينسحب الكورس وتظهر الشول وهي تقف أمام مكتب المسئول الأول، المسئول الأول يتحدث بالتلفون بينما الشول تقف إلى جانب المكتب

المسئول الأول :- ما بقدر و الله، لا، ما انت كمان ما تحرجني، لا، والله اكتر من خمسه ما بقدر، لا، ما صعبة شوية، لا، انت كمان قدر موقفي، خمسة صناديق بس، مافي ناس تانين كمان، ما تبقي طماع، انسي الموضوع ده، اها عملت لي شنو في الموضوع، أيوه موضوع الطحنية؟

الشول:- (تهمس) طحنية

المسئول الاول:- ايوه خلاص، ما زي ما قلت ليك السمسم كلو عندنا

الشول:- السمسم؟

المسئول الأول:- خلاص نتلاقي بعدين، اي جهز المواضيع عشان نخلص، طيب مع الف سلامة

(يضع السماعة، يلتفت نحو الشول)

المسئول الاول:- اهلا يا حاجه، اتفضلي، اقعدي

(الشول تجلس على كرسي يمين المكتب)

المسئول الاول:- مرحب يا حاجه، أي خدمة؟

الشول:- والله يا ولدي الحقيقة انا عندي ولدي، جار النبي هو الوحيد الفضل لي وبعدين (يرن جرس التلفون)

المسئول الاول:- أهلا يا مرحب، ارفع صوتك شويه، لا، اي ، لا دي مسألة منتهية، أيوه زي ما بقول ليك، لا خلص البيعة طوالي، أيوه ، ما عارف أنا ، مش البوهية الخضراء، أيوه، ما خلاص حنشوف طريقة نسلكها، نوزعها كلها، ما تستعجل، انت استلم البضاعة كلها وبعدين انا اتكلمت مع المعتمد، ايوه حيطلع قرار واضح، كل الدكاكين حتضرب اخضر، بقول ليك قرار، قرار من المعتمد، ايوه، (يضحك)، خداري البي حالو ما هو داري، إطمئن يارجل، الله كيف؟ ممكن بعد ده تغني بصوت جهور الاخضر لونو زرعي (يغني بإستمتاع )، الشول تظهر علي وجهها علامات من الدهشة.

المسئول الاول:- (يضحك)، خلاص ياسيدي، اي مر علي بكره، طيب مع السلامة، علي بركة الله، (يضع السماعة)، قلت شنو يا حاجه؟

الشول:- اها جار النبي.

المسئول الاول:- جار النبي منو؟

الشول:- ولدي.

المسئول الاول:- مالو؟

الشول :- قبضوهو و ودوهو المعسكرات و حيودهو الحنوب.

المسئول الاول:- اها و بعدين؟

الشول :- ما عندي غيرو، اها دايراك يا ولدي يعني بي معرفتك كده ترجعو لي في شان انا مره كبيرة وما عندي غيرو، هو الفضل لي، ابوهو قبال ده مات في الجنوب واخوهو.

المسئول الاول:- (يقف منفعلا)، لا، لا ياحاجه، ده موضوع كبير، موضوعك ده ياحاجه بتحلا فوق

(يدخل الكورس يغطي المشهد و يرفع الكورس الايادي بحركة واحدة و بصوت واحد)

الكورس:- فوق

(ينسحب الكورس، مكتب المسئول الثاني، نلاجظ ان التلفونات قد زادت واحد لتصبح ثلاث تلفونات على المكتب، تدخل الشول)

الشول:- إزيك يا ولدي.

المسئول الثاني:- اهلا يا حاجه، اتفضلي.

الشول:- انت الفضيل.

المسئول الثاني:- اي خدمة؟

الشول:- ولدي جار النبي هو

(يرن جرس التلفون )

المسئول الثاني:- أهلا، ده خبر جميل، قلت لي كم طن، بلاهي؟ ، يعني اللواري وصلت، لا، ده زمن كويس لانو السوق مكشوف خالص، كلم الجماعة فورا، قول ليهم البطاطس وصل

الشول:- البطاطس؟

المسئول الثاني:- خلاص، انت ما تنزل السوق الا تضمن الجماعة المعانا اشتروا كل البطاطس الفي السوق

(يرن جرس التلفون الثاني)

خليك معاي، دقيقة، (يضع سماعة التلفون الذي كان يتحدث به على المكتب)، الو، اهلا، وينك يارجل؟، ياخي انا ما متوقعك، لا، خلاص، انت عارف متخزن وين؟، ايوه، في نفس المكان، الحوش الكبير، اي الفحم ده خليهو في الركن الغربي

الشول:- الفحم

المسئول الثاني:- لا، باليل طبعا، كم لوري؟، ليه عشرة؟، الباقي وين؟، لا، كده معليش، طيب مع السلامة، (يضع السماعة و يعود الي التلفون الاول )، الو، معليش ، بقول شنو، عملت شنو في موضوع اللالوب؟ ، يعني عملت الترتيبات كلها، لا، مهم جدا وبعدين في اسرع فرصة ممكنة لانو اللالوب ده في ظرف شهر حنصدرو ـ ايوه ، إستعجل لي موضوع اللالوب وما تنسي القضيم، يار اجل هم شويه

الشول:- لالوب؟، قضيم؟

المسئول الثاني:- إتصلح معانا شويه، اي، تمام، ما في مشكلة، خلاص نتلاقي بعدين، اي في البيت، طيب مع السلامة، (يضع السماعة)، ايوه يا حاجة، اي خدمة؟

الشول:- ولدي جار النبي قبضوهو و ودهو المعسكرات و يمكن يكون في الجنوب هسه

المسئول الثاني:- يا سلام يا حاجه، اهو ولدك مجاهد ويمكن ربنا يمن عليهو بالشهادة

الشول:- يبري يا يمه، انا ما عندي غيرو و بعدين ابوهو قبال ده مات في الجنوب واخوهو الكبير مات بي لغم في جبال النوبة وما عندي غيرو جار النبي، عشان كده بي معرفتك خليهم يرجعو لي.

المسئول الثاني:- (يقف منفعلا)، عيب، عيب يا حاجه، و بعدين الموضوع ده هناك

(يدخل الكورس يغطي المشهد و يشير يالايادي الي ابعد مدي ممكن وبصوت واحد)

الكورس :- هناك

( ينسحب الكورس، مكتب المسئول الثالث، علي المكتب أربعة تلفونات، الشول ست القول تجلس علي كرس في يسار المكتب بينما المسئول الثالث يصرخ في التلفون وهو واقف خلف المكتب)

المسئول الثالث:- ما علي كيفو، ايوه، اسمع انت قول ليهو لازم يبيع، ايوه، لازم

(يرن جرس تلفون اخر، برفع المسئول الثالث السماعة بينما يصرخ في السماعة الاولى).

المسئول الثالث:- دقيقة خليك معاي، الو اضرب لي بعد شويه، بعد خمسة دقايق، اسمع يا عباس، قول ليهو لازم يبيع والله اقول ليك انت حرر شيك باسمو وسوق معاك ثلاثة من الجماعة بتاعيننا، ايوه، ما لازم يكونو متسلحين وخلي العربات تمشي معاك، ما تصرف يا بني ادم، (يتذكر السماعة الثانية في يده)، عباس، خليك معاي دقيقة بس، (يتكلم في السماعة الثانية)، معليش، منو معاي؟، هدى عليك الله اضربي لي بعد ساعة، انا في اجتماع.

الشول:- شوفو المحن دي.

المسئول الثالث:- يعني حاطير وين يا هدى ما حاجي البيت، يلا مع السلامة،( يضع سماعة التلفون الثاني ويعود الي السماعة الاولي)، اي يا عباس، شوف الكمية العندو كم وعلى ضوءها حدد عدد العربات، ايوه، امشي ليهو في الدكان و معاك الجماعة إياهم وخليهو يمشي معاك المخازن، ترفع العيش كلو في العربات وبعد تتم العملية دي ارمي الشيك في وشو، هو قايل نفسو شنو؟، مفهوم الكلام ده، ما هو عايز كده، قلنا ليهو بيع لينا بالحسنة رفض، نعمل ليهو شنو؟، ايوه، نفذ زي ما بقول ليك، بعد داك انت عارف العيش حيمشي وين؟ انت غبي ولا شنو؟، ايوه هناك.

(يرن جرس التلفون الثالث)

المسئول الثالث:- ( يرفع سماعة التلفون الثالث، اهلا، يا مرحب، دقيقة بس، خليك معاي، الو، عباس، خلاص اتحرك ونفذ الكلام القلتو ليك ومجرد ما تم العملية، تعال لي في البيت، ايوه، اسمع، ما البيت الكبير، البيت التاني، طيب مع السلامة، (يضع سماعة التلفون الاول ويتحدث في سماعة التلفون الثالث ) الو، مرحب، ايوه، جميل، لا خلاص، أتاكد كويس من الكمية في الاول، ما عندو حاجه تانية غير بصل المكاده؟

الشول:- بصل مكاده؟

المسئول الثالث:- خلاص، أتاكد هو عندو شنو غير بصل المكاده، كويس برضو، خلاص شوف الكمية واضرب لي تاني، كويس، اسمع، إتصلت بالدويم؟، ده كلام شنو؟، بطل الكسل ولا حتطير مننا الجبنه المضفورة، لا، المضفورة دي اهم حاجه لانو عليها طلب تصدير عالي، خلاص، إتحرك، طيب مع السلامة، (يضع السماعة ولا يلتفت نحو الشول، يبدو انه نسي وجودها، الشول تنظر اليه ويدها علي خدها نظرات تعجب واضحة، تنتظر ان ينتبه الي وجودها وحين لا يفعل، تعلن عن وجودها بسعال مفتعل، يرتبك المسئول الثالث وكانه فؤجي بوجود الشول ويحاول يتفادي نسيانه اياها.

المسئول الثالث:- اسف ياحاجه والله بس المشغوليات، قلت لي، انت عايزة شنو بالضبط؟

الشول:- ما قلت ليك جار النبي.

المسئول الثالث:- جار النبي، ايوه، جار النبي عايز شنو؟، بس يا حاجه حكاية التصاديق دي يعني ما لي أي زول.

الشول:- انت أظنك نسيتني و نسيت كلامي كمان، جار النبي ولدي.

المسئول الثالث:- لا، ابدا، ما نسيت، عارفو ولدك، مش دايرة تشغليهو؟

الشول:- هو انا لامه فيهو عشان اشغلو.

المسئول الثالث:- هو وين يا حاجه؟، ضايع ولا شنو؟

الشول:- ما قلت ليك ياخوي قبضوهو من الشارع

( يرن جرس التلفون الرابع، يرفع المسئول الثالث السماعة)

المسئول الثالث:- عن إذنك يا حاجه.

الشول:- (بإمتعاض واضح)، إذنك معاك.

المسئول الثالث:- الو، ايوه معاك، يقف فرحا، ما بصدق، حيذيعو الليلة في نشرة تسعة؟، لا، ده خبر جميل، القرار كيف ذاتو؟، واضح جدا؟، ده كلام جميل، خلاص، ما في مشكلة، اسمع القرار بشمل كل الاجهزة الالكترونية؟، طيب بعد إذاعة القرار إتصل بالمنظمة خليها تجهز نفسها عشان نعمل ليها إعفاء وبعد داك ندخل الاجهزة بي اسمها، هي زي كم يعني؟، خمسة ألف جهاز؟، الماركة شنو؟، توشيبا؟، أحجام مختلفة؟، ايوه اعفاء من القرار وإعفاء من الجمارك، ايوه، باسم المنظمة وبي الختم والهيد بيبر بتاع المنظمة واتصل ما تنسي بي زولنا في السوق بلغو بي خمسة ألف جهاز تلفزيون يعني، أيوه عشان يستعد هو كمان، خير، لا، ما في عوجه، خلاص، أنا حاتابع إذاعة القرار، قلت لي في نشرة تسعة؟، طيب، مع السلامة، يضع السماعة، يلتفت نحو الشول، اها قلت لي شنو يا حاجه؟

الشول:- اها ولدي جار النبي ده قيضوهو.

المسئول الثالث:- القبضو منو؟

الشول :- ناس التجنيد الاجباري.

المسئول الثالث:- وبعدين؟

الشول:- وبعدين ودوهو المعسكرات وقالو بعد داك ودوهو الجنوب وانا ما عندي غيرو، اها عايزاك بي معرفتك ترجعو لي.

المسئول الثالث:- والله يا حاجه.

(يرن جرس التلفون ـ يرفع المسئول الثالث السماعة)

المسئول الثالث :- إذنك يا حاجه.

الشول :- إذنك معاك.

المسئول الثالث:- الو، ايوه معاك، كيف يعني؟، اسمع، ما تقول لي ما لاقيتو في البيت، ده كلام فارغ ده، اقول ليك، سوق الجماعة وامشي طوالي علي المخازن بتاعتو، الجماعة معاك؟، خلاص من دربك ده طوالي علي المخازن، ايوه، اكسرو الابواب وانقلو العيش في اللواري وبعد داك فتشو عشان تجدع ليهو الشيك في وشو، ما تقول لي لكين، نفذ الكلام البقولو ليك يا حيوان، يضع السماعة بانفعال شديد.

الشول:- ياساتر يارب

المسئول الثالث:- انت قلت شنو؟

الشول :- ما يعني بخصوص ولدي جار النبي.

المسئول الثالث :- جار النبي مالو ؟

الشول:- ما قلت ليك قبضوهو وودهو الجنوب وانا عايزاك ترجعو لي

المسئول الثالث :-(يضحك بطريقة غريبة)، يا حاجه، ده موضوع كبير، كبير جدا، عشان كده حلو هناك، عند الناس الكبار.

(لكورس يدخل يغطي المشهد و يشير بالأيادي إشارة واضحة وبصوت واحد)

الكورس:- الكبار.

(ينسحب الكورس، مكتب المسئول الرابع، مكتب ضخم، عدد كبير من التلفونات متناثرة على المكتب، يبدو المسئول الرابع أكثر هدوءا ووقارا من أولئك الذين قابلتهم الشول من قبل، يظهر ذلك من خلال حديثه بالتلفون، الشول كالعادة جالسة على طرف المكتب تنتظر أن ينتهي المسئول الرابع من حديثه في التلفون).

المسئول الرابع:- الحمد الله، ايوه، الرزق طلاقيت، الرزق اقسام، نعم، ما في زول بشيل رزق زول، الحمدلله، الاولاد ديل نشيطيين، اي والله، كان جريت جري الوحوش غير رزقك ما بتحوش، جزاك الله كلو خير، اي اشتري بيهم دولارات، ما انت عارف، الحمد لله، خلاص علي بركة الله، جزاك الله كلو خير وعليكم السلام ـ (يضع السماعة بهدوء غريب و يلتفت نحو الشول).

المسئول الرابع :- انشا الله خير.

الشول :- خير انشا الله.

المسئول الرابع:- طلباتك.

الشول :- انا جيت.

( يرن جرس التلفون ـ يرفع المسئول الرابع السماعة).

المسئول الرابع :- عليكم السلام رحمة الله تعالي وبركاتو، ايوه، خلاص إتصل بعدين بماليزيا، اي نعم، سبحان الله والله كنت داير أسألك من الموضوع، يعني حصل خير لآ الحمد لله، خلاص، تعال صلي معاي المغرب وبعدين نشوف موضوع البطيخ.

الشول:- البطيخ؟

المسئول الرابع:- خلاص علي بركة الله، ما تنسانا من دعواتك، جزاك الله كلو خير، نتلاقا بعدين، (يضع السماعة و يلتفت للشول).

المسئول الرابع :- قلت شنو يا حاجه؟

الشول :- ولدي جار النبي، قبال ده ابوهو مات في الجنوب و اخوهو الكبير عبد العاطي.

(يرن جرس التلفون، المسئول يرفع السماعة)

المسئول الرابع:- وعليكم السلام و رحمة الله تعالي و بركاتو، اي نعم، خلاص تعال صلي معاي المغرب، الحمدلله، نتكلم بي رواقة عن تصاديق البيبسي.

الشول:- البيبسي؟

المسئول الرابع:- ربنا ما كريم والله انا قنعت من شحنة الشمام، كلو زول بي رزقو وربنا ما شق حنكا ضيعو، خلاص بعدين، علي بركة الله ـ (يضع السماعة)، قلت شنو يا حاجه؟

الشول:- ولدي جار النبي، ابوهو مات في

(يرن جرس التلفون ـ يرفع المسئول الرابع السماعة).

المسئول الرابع:- وعليكم السلام ورحمة الله تعالي وبركاتو، الحمدلله، نحمدو ونشكرو، ايوه، وزع المهام دي علي المنظمات، ما هو الحمد لله المنظمات كتيرة، اي نعم، خلاص، كل منظمة اديهتا سلعة، اي نعم، الحمدلله، خلاص يا شيخنا علي بركة الله ـ يضع السماعة ويلتفت للشول، جار النبي مالو؟

الشول:- ولدي ابوهو مات في الجنوب و اخوهو الكبير مات بي لغم في جبال النوبه وما عندي غيرو وعايز.

(يرن جرس التلفون، يرفع المسئول الرابع السماعة)

المسئول الرابع :- و عليكم السلام و رحمة الله تعالي و بركاتو، الخير علي قدوم الوارديين، وصلت متين؟ حمد لله علي السلامة، بركاوي، الحمد لله، خلاص تعالي صلي معاي المغرب، انشاالله، الحمدلله، انشاالله، الحمدلله، خلاص، علي بركة الله ـ (يضع السماعة السماعة ويلتفت للشول)، جار النبي ضربو لغم ؟

الشول:- يبري، ما هو الضربو لغم، اخوهو الكبير، اها انا ما فضل لي غيرو، داك الليلة لمو فيهو ناس التجنيد الاجباري و قبضوهو و ودهو المعسكرات، مشيت فتشت المعسكرات معسكر معسكر ما لميت فيهو، بكون ودوهو ال

(يرن جرس التلفون ـ يرفع المسئول الرابع السماعة)

المسئول الرابع:- وعليكم السلام ورحمة الله و بركاتو، (يضحك)، استغفر الله، خلاص كلم الاولاد، السوق والحمد لله ناشف، إتصرف من المليون العندك، الحمد لله، خليهم يستنفعو، اي نعم، اشوفك بعدين، بعد العشاء، زين، علي بركة الله، (يضع السماعة ـ يلتفت للشول)، ما لاقيتي في المعسكرات؟

الشول:- ما لقيتو، قالو سفروهم الجنوب عشان الجهاد.

المسئول الرابع:- (بفرح إنفعالي) البشري يا حاجه ولدك موعود بالجنه.

الشول:- علا انا وحيدة و بدورك ترجعو لي من الجنوب، (تبكي) ـ قبال ده أبوهو مات في لجنوب وأخوهو الكبير ضربو لغم في جبال النوبة وجار النبي صغير وانا وحيدة.

المسئول الرابع:- خلاص يا حاجة، خير انشا الله، ولدك يرجع، برجع انشا الله، بإذن الله ياحاجة، خلاص، شيلي معاي الفاتحة، الفاتحة.

الشول:- تقف وتصرخ في وجه المسئول الرابع، لا، لا، ترفع سماعة احدى التلفونات وتقربها من وجه المسئول الكبير.

الشول:- لا، لا، التلفون